عشان انته مصري

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله
بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف



تحياتي اسيـــ الحب ـــــر

بصراحه عيبه انك تشتم في بلدك كده هي صح فيها حاجات كتيره وحشه ومش مناسبه ان الواحد يعيش فيها بس في الاول والاخر دي مصر يعني النيل والاهرامات والاكل الحلو والقعده اللي تجنن مع صحابك فوق السطح وكوبايه الشاي اللي زي الفل وكل حاجه حلوه اوي ومتنساش انك في اي بلد تانيه بتزهق بسرعه اما في مصر لو زهقت انزل في الشارع وانت تبقى فل دي ام الدنيا مش معنى كده ان كلامك غلط بالعكس انت صح بس بالنسبه للناس اللي مبيحسبوهاش صح بيبصو لمصر من فوق مش زي الناس الطيبه من تحت خلص الكلام سلام

خلاص يا عم انا اسف

عشان انتة مصري لازم ترفع راسك عالي
وتهزء الدنيا ولاتشلش همهة باليالي
وتقول للشعب المصري يناس
احنة اصلنة كرم واحساس
وانشرف كل عربي لوة مداس


ابو علي لا تأيس من الدنية لان مصر هية ام الدنية

على فكره يا ابراهيم
اذا انا نزلت موضوع زي ده متفهمش انو انا معنديش وطنيه لمصر
بالعكس انا بموت في تراب مصر

وانا منزل الموضوع ده عشان الفرفشه شويه


وانا بحييك يا يس على الوطنيه الي انته فيها
بس انا مكنش قصدي اني ازعل اي حد فيكم


وشكرا على مروركم

تحيا مصر ابو علي تسلم على الموضوع الجميل ومفيش احد ما يحب بلدة

اذا كان مصري او غير كلنا انحب بلاادنا